 |
| GOLLEGIELLA – Davviriikkalaš sámegiela giellabálkkašupmi | Kuvallinen versio |
Giellabálkkašumi leat ásahan sámeáššiin vástideaddji ministarat Norggas, Ruoŧas ja Suomas ovttas dáid riikkaid sámediggepresideanttaiguin. Bálkkašupmi geigejuvvui vuosttaš geardde jagi 2004, ja dat juhkkojuvvo juohke nuppi jagi. Bálkkašumi sturrodat lea 12 500 euro.
Gollegiella 2010
Gollegiella - davviriikkalaš sámi giellabálkkašupmi geigejuvvo njealját geardde čakčat 2010 sámeministariid ja sámediggepresideanttaid deaivvadeamis Stockholmas skábmamánus.
Giellabálkkašupmi addojuvvo ovttaskas olbmui dehe organisašuvdnii Norggas, Ruoŧas, Suomas dehe Ruoššas sámegiela ovddideamis.
Gii sáhttá oažžut bálkkašumi?
Giellabálkkašupmi juhkkojuvvo ovttaskas olbmuide (maiddái joavkkuide) dehe servošiidda (omd. searvi, ovttastus, ásahus, instituhtta) mat leat earenoamážit bidjan návccaid sámegiela ovddideapmái, gárggiidahttimii dehe seailluheapmái. Giellabálkkašupmi sáhttá addojuvvot ovdamearkka dihte čálalaš, njálmmálaš dehe eará bargguin mat gusket hui viidát sierra servodatsurggiide. Bálkkašumi supmi sáhttá juogadit eanet go ovtta vuoitái.
Ovttaskas olmmoš, joavku dehe searvvuš Norggas, Ruoŧas, Suomas ja Ruoššas sáhttá dahkat evttohusa jagi 2010 bálkkašumi vuoitin. Evttohus bálkkašumi vuoitin oktan čálalaš ákkastallamiin man guhkkodat oažžu leat eanemustá 1-2 siiddu, galgá ollet čakčamánu 1. beaivvi rádjai dán čujuhussii:
Brita Stina Sjaggo (árvvoštallanlávdegotti čálli)
Samediggi
Box 90
SE-981 22 Giron/Kiruna
Sweden
Tel: +46(0)70-33 99 575
Fax: +46(0)980-780 31
e-mail: brita@sametinget.se
Gollegiella 2008
KOLLEKIELÂ – Tave-eennâmlâš säämi kielâpalhâšume juáhhoo čohčuv 2008 (pdf)Gollegiella – Pohjoismainen saamen kielipalkinto jaetaan syksyllä 2008 -teksti koltansaameksi (pdf)
DAVVIRIIKKALAŠ SÁMI GIELLABÁLKKAŠUPMI – GOLLEGIELLA NJUOLGGADUSAT
DAVVIRIIKKALAŠ SÁMI GIELLABÁLKKAŠUPMI – GOLLEGIELLA BAGADUS
Dieđáhus: Sámegiela giellabálkkašupmi Ohcejoga sámesearvái ja ruoŧŧelaš ubmisámegiela oahpaheaddjái.
Davviriikkalaš sámi giellabálkkašupmi – Gollegiella njuolggadusat
§ 1 Ásaheapmi
Davviriikkalaš sámi giellabálkkašumi leat ásahan Norgga, Suoma ja Ruoŧa sámi áššiin vástideaddji ministarat ja dáid riikkaid sámedikkiid presideanttat. Giellabálkkašumi namma lea Davviriikkalaš sámi giellabálkkašupmi – Gollegiella.
Bálkkašupmi juhkkojuvvo juohke nuppi jagi, vuohččan 2004 rájes.
§ 2 Ulbmil
Giellabálkkašumi ulbmilin lea váikkuhit sámegiela ovddideapmái, gárggiidahttimii ja seailluheapmái Norggas, Ruoŧas, Suomas ja Ruoššas.
§ 3 Bálkkašumi oažžu
Giellabálkkašupmi juhkkojuvvo ovttaskas olbmuide dahje servošiidda, mat leat bidjan earenoamáš návccaid ovddidit, gárggiidahttit dahje seailluhit sámegiela. Giellabálkkašupmi sáhttá mieđihuvvot viidát iešguđelágan doaibmasurggiide.
Bálkkašumi supmi sáhttá juogadit eanet go ovtta vuoitái.
§ 4 Bálkkašumi sturrodat
Giellabálkkašumi sturrodat lea oktiibuot 12 500 euro.
Bálkkašumi vuoiti vástida ieš vejolaš vearu máksimis.
§ 5 Árvvoštallanlávdegoddi
Giellabálkkašumi várás nammaduvvo árvvoštallanlávdegoddi, mii vállje bálkkašumi vuoiti. Árvvoštallanlávdegottis leat oktiibuot vihtta lahtu. Sámi parlamentáralaš ráđđi nammada njeallje lahtu ja bálkkašumi mieđiheaddji riika ovtta lahtu.
Árvvoštallanlávdegottis galgá leat vuđolaš áššedovdamuš sámegielas ja sámi giellabarggus sihke sámi kultuvrras ja servodateallimis.
Bálkkašanseremoniija lágidanriika bovde árvvoštallanlávdegotti vuosttaš čoahkkimii ja fuolaha hálddahusalaš bargguin. Árvvoštallanlávdegoddi nammada ságajođiheaddji. Árvvoštallanlávdegoddi válljejuvvo juohke njealját jagi.
§ 6 Almmuheapmi
Árvvoštallanlávdegoddi almmuha Davviriikkalaš sámi giellabálkkašumis – Gollegielas ja dasa gullevaš almmolaš evttohanrievttis vuogas lági mielde.
§ 7 Bálkkašumi juohkin
Giellabálkkašupmi juhkkojuvvo sámeministariid ja sámediggepresideanttaid oktasaš čoahkkimis árvvoštallanlávdegotti čálalaš ákkastallama vuođul.
§ 8 Ruhta
Norgga, Ruoŧa ja Suoma ráđđehusat juolludit ruđa bálkkašumi ruhtamearrái ja dasa gullevaš hálddašeapmái. Norga juolluda ruđaid 2004 ja 2006 váste, Suopma 2008 váste ja Ruoŧŧa 2010 váste. Dan maŋŋel ruhtadeamis vástidit Norgga, Suoma ja Ruoŧa ráđđehusat, dás namuhuvvon ortnegis.
§ 9 Njuolggadusaid rievdadeapmi
Dáid njuolggadusaid ja bálkkašumi supmi sáhttet Norgga, Ruoŧa ja Suoma sámeministarat ja dáid riikkaid sámediggepresideanttat rievdadit.
---
Dát njuolggadusat, maid sámeministarat ja sámediggepresideanttat leat nannen 14 beaivve skábmamánus 2007, buhttejit 17 beaivve skábmamánus 2004 nannejuvvon njuolggadusaid.
Davviriikkalaš sámi giellabálkkašupmi – gollegiella bagadus
§ 1 Árvvoštallanlávdegoddi
Árvvoštallanlávdegoddi galgá bargat iešráđálaččat.
Árvvoštallanlávdegoddi fuolaha geavatlaš doaimmain, mat gusket evttohasaid nammadeapmái, árvvoštallamii ja bálkkašumi vuoiti válgii.
Mearrádusaid galgá čállit beavdegirjái.
Árvvoštallanlávdegottis lea mearridanváldi, go unnimusat golbma lahtu oassálastet čoahkkimii. Mearrádusat dahkkojuvvojit eaŋkil eanetloguin. Jus leat seamma ollu jienat, de mearrádus dahkkojuvvo vuorbádeami vuođul.
§ 2 Evttohanriekti ja evttohasaid nomineren/nammadeapmi
Eavttohanriekti lea Norgga, Ruoŧa, Suoma ja Ruošša stáhta vuložiin, servošiin, ásahusain ja eiseválddiin. Árvvoštallanlávdegoddi galgá viggat dasa, ahte eanas giellajoavkkut leat fárus eavttohasaid searvvis.
§ 3 Bálkkašumi oažžu
Ovttaskas olmmožin ipmirduvvojit maiddái ovttaskas olbmuin šaddan joavkkut. Organisašuvnnaide gullet maiddái searvvit ja ásahusat.
§ 4 Áigemearri
Árvvoštallanlávdegoddi meannuda evttohusaid dakkár áigeplánain, ahte dat sáhttá maŋimustá čakčamánu 30 beaivve dieđihit mearrádusa oktan čálalaš ákkastallamiin Davviriikkalaš sámeáššiid virgeolmmošorgánii.
§ 5 Diploma/plakeahtta
Davviriikkalaš sámeáššiid virgeolmmošorgána vástida diploma/plakeahta hábmemis.
§ 6 Hálddašeapmi
Hálddašemiin oaivvilduvvo árvvoštallanlávdegotti bargu, masa gullá bálkkašumi almmuheapmi, evttohasaid nammadeapmi ja čálalaš ákkastallama ráhkadeapmi bálkkašumi vuoiti válgga várás. Hálddašeapmái gullet maiddái mátkegolut, mat šaddet bálkkašumi vuoiti ja árvvoštallanlávdegotti mátkkis bálkkašumi juohkindilálašvuhtii.
Bálkkašumis galgá almmuhit vuosttažettiin ovdamearkka dihte ráđđehusaid ja sámedikkiid interneahttasiidduin ja sáddemiin preassadieđáhusa.
§ 7 Ruhtadoalu dikšun
Hálddahuslaš goluid čilgehusat, ruhtadoalu dikšun ja revišuvdna galget čuovvut buriid ruhtadoallovieruid. Čilgehusa galgá addit Davviriikkalaš sámeáššiid virgeolmmošorgánii.
§ 8 Njuolggadusa rievdadeapmi
Dán bagadusa sáhttá rievdadit Davviriikkalaš sámeáššiid virgeolmmošorgána.
---
Dát bagadus, mii lea nannejuvvon čálalaš meannudanvugiin 29.2.2008, buhtte 1 beaivve suoidnemánus 2004 nannejuvvon bagadusa.